باب نہم: خون کے سورج کا آخری غروب

 

باب نہم: خون کے سورج کا آخری غروب

القمونیہ میں امید کی نئی کرن پھوٹ رہی تھی۔ عوام نے جبر سے آزادی حاصل کر لی تھی، مگر سکون کا یہ لمحہ عارضی تھا۔ دشمن سائے میں دبے قدموں واپس آ رہا تھا۔ جنرل عتیق نے اپنے بچ جانے والے سپاہیوں کے ساتھ سرحد پار خفیہ پناہ گاہ بنا رکھی تھی۔ اس کا چہرہ زخموں سے بھرا ہوا تھا مگر آنکھوں میں انتقام کی آگ روشن تھی۔ اس کے ساتھ مولوی اعظم کا بیٹا بھی شامل تھا، جو باپ کی موت کا بدلہ لینا چاہتا تھا۔

عتیق نے اپنی فوج کو مخاطب کر کے کہا:
"ہم نے اس قوم کو جہالت میں رکھا، مذہب کا نام لے کر انہیں غلام بنایا، اور علیان نے یہ سب برباد کر دیا۔ مگر ہم واپس آئیں گے۔ وہ لوگ جو آج آزادی کے نعرے لگا رہے ہیں، کل ہماری تلوار کے سامنے جھک جائیں گے۔"

دوسری طرف، علیان کو علم تھا کہ دشمن چین سے نہیں بیٹھے گا۔ اس نے دارا، زہرہ، صفیہ اور دیگر ساتھیوں کے ساتھ مل کر نئے قوانین بنانے شروع کیے۔

صفیہ نے تعلیم کی ذمہ داری سنبھال لی تھی۔ وہ لڑکیوں کو پڑھنے پر آمادہ کر رہی تھی، انہیں بتایا جا رہا تھا کہ علم نہ مرد کا ہوتا ہے نہ عورت کا، یہ انسان کا حق ہے۔

زہرہ نے خواتین کے لیے دستکاری اور کاروبار کا نظام شروع کیا، تاکہ وہ مالی طور پر خود مختار ہو سکیں۔

دارا نے فوج کو دوبارہ منظم کرنا شروع کیا، مگر یہ فوج عوام کے محافظ کے طور پر تیار کی جا رہی تھی، نہ کہ ان پر ظلم کرنے کے لیے۔

علیان نے عوام کو خطاب کرتے ہوئے کہا:
"ہم نے ظالموں کو ہٹا دیا، مگر ہمیں اپنا ذہن بھی آزاد کروانا ہوگا۔ اگر ہم پھر سے اندھے عقیدے اور جھوٹے رہنماؤں کے پیچھے لگ گئے تو ہماری یہ قربانی بیکار چلی جائے گی۔"

اسی رات، جب شہر خوابوں میں گم تھا، جنرل عتیق کے سپاہیوں نے شہر کے دروازے پر حملہ کر دیا۔ وہ چپکے سے دیوار پھلانگ کر اندر گھس آئے اور بازار میں آگ لگا دی۔

صفیہ اور زہرہ نے عورتوں کو منظم کیا، انہوں نے پانی اور کپڑوں سے آگ بجھانے کی کوشش کی، مگر دشمن تعداد میں زیادہ تھا۔

علیان، دارا اور باقی ساتھیوں نے ہتھیار اٹھا لیے اور قلعے کے دروازے پر جا کھڑے ہوئے۔ علیان نے للکار کر کہا:
"ہم پھر غلام نہیں بنیں گے! اگر مرنا ہے تو عزت کے ساتھ مریں گے!"

آخرکار، علیان اور جنرل عتیق کا سامنا ہوا۔ دونوں زخمی مگر مضبوط تھے۔ عتیق نے غصے سے کہا:
"تم نے ہمارا نظام برباد کر دیا! عوام کو آزادی دے دی؟ یہ قوم جاہل ہے، یہ آزادی سنبھال نہیں سکے گی!"

علیان نے سکون سے جواب دیا:
"قوم جاہل نہیں، اسے جہالت میں رکھا جاتا ہے۔ ہم انہیں علم دیں گے، شعور دیں گے، اور وہ خود فیصلہ کریں گے کہ کون صحیح ہے اور کون غلط۔"

عتیق نے حملہ کیا، مگر علیان نے چالاکی سے اسے زیر کر لیا۔

عتیق زمین پر گرتے ہوئے بولا:
"تم یہ جنگ جیت سکتے ہو، مگر یاد رکھنا... اقتدار کا نشہ سب کو اندھا کر دیتا ہے۔ اگر تم بھی حاکم بننے کا خواب دیکھو گے تو ایک دن تم بھی میری جگہ کھڑے ہوگے!"

علیان نے افسردگی سے کہا:
"ہم حاکم نہیں، خادم بنیں گے۔ یہی فرق ہے!"

جنرل عتیق کےبھاگ  جانے کے بعد اس کے فوجی بھاگ کھڑے ہوئے۔ عوام نے خوشی میں نعرے لگائے۔

صفیہ نے علیان سے کہا:
"یہ جنگ جیت لی، مگر اصل امتحان ابھی باقی ہے — جہالت کے خلاف جنگ۔"

علیان نے مسکرا کر جواب دیا:
"یہ جنگ ہم سب کو مل کر لڑنی ہوگی، تاکہ کل کا قمونیہ علم، انصاف اور آزادی کی پہچان بنے!"

 

 

 

باب ہشتم: نئی صبح، نئے زخم

 

باب ہشتم: نئی صبح، نئے زخم

القمونیہ کے آسمان  پر آزادی کا سورج طلوع ہو چکا تھا، مگر زمین پر خون کی سرخی باقی تھی۔ علیان، دارا، زہرہ، صفیہ اور ان کے ساتھیوں نے ظالم حکومت کے ستون گرا دیے تھے، مگر یہ صرف پہلا قدم تھا۔ اصل امتحان اب شروع ہونا تھا — ایک نئی ریاست قائم کرنا، جہاں نہ مذہب کو ہتھیار بنایا جائے، نہ فوج کو ڈر کا ذریعہ، اور نہ عوام کو جہالت کی زنجیروں میں جکڑا جائے۔محل کا تخت خالی ہو چکا تھا۔ مولوی اعظم کو عوام نے چوک میں انصاف کے کٹہرے میں کھڑا کر کے اس کا ظلم یاد دلا دیا تھا۔ جنرل عتیق میدان سے فرار ہو گیا تھا، اور اس کے فوجی یا تو عوام کے ساتھ مل چکے تھے یا جان بچا کر بھاگ گئے تھے۔

مگر اب سوال یہ تھا: آگے کیا؟

علیان نے چوک کے بیچ کھڑے ہو کر کہا:
"ہم نے تخت گرا  دیا، مگر یہ کافی نہیں ہے۔ ہمیں ایک نیا نظام بنانا  ہوگا — ایسا نظام جہاں کوئی حاکم نہ ہو، جہاں ہر شہری کا حق برابر ہو، اور جہاں علم کو قید نہ کیا جا سکے۔"

عوام نے نعرے لگائے:
"علیان زندہ باد! آزادی زندہ باد!"

مگر علیان نے مسکرا کر کہا:
"یہ جنگ میری نہیں، ہم سب کی ہے۔ میں بادشاہ نہیں بننا چاہتا۔ میں چاہتا ہوں کہ القمونیہ کے عوام خود اپنی تقدیر کا فیصلہ کریں!"

دارا نے قریب آ کر آہستہ سے کہا:
"ہم نے ظالموں کو بھگا  تو دیا، مگر جنرل عتیق اور اس کے وفادار ابھی زندہ ہیں۔ وہ ضرور پلٹ کر آئیں گے۔"

صفیہ نے تیزی سے جواب دیا:
"ہمیں نئے نظام کی بنیاد رکھتے ہوئے پرانے دشمنوں پر بھی نظر رکھنی ہوگی۔ یہ جنگ ابھی ختم نہیں ہوئی!"

علیان نے اثبات میں سر ہلایا:
"ہمیں جلد از جلد عبوری حکومت بنانی ہوگی، تاکہ دشمنوں کو دوبارہ قدم جمانے کا موقع نہ ملے۔"

بی بی زہرہ اور صفیہ نے خواتین کو منظم کرنے کی مہم شروع کر دی۔ صفیہ نے ایک مجمع سے خطاب کیا:
"ہم نے صرف اپنے مردوں کا ساتھ نہیں دیا، بلکہ اپنی آزادی کے لیے بھی لڑیں ہیں۔ اب ہم پیچھے نہیں ہٹیں گی۔ ہم علم حاصل کریں گی، ہم اپنے بچوں کو جہالت کی بجائے علم   کی              روشنی  دیں گی، اور ہم اس ملک کو دوبارہ ظالموں کے حوالے نہیں کریں گی!"

عورتوں نے بلند آواز میں نعرے لگائے:
"ہماری بیٹیاں بھی زندہ باد! آزادی زندہ باد!"

شہر کے باہر، ویران جنگل میں، جنرل عتیق نے اپنے بچ جانے والے سپاہیوں کو جمع کیا۔ وہ زخمی اور غصے سے بھرا ہوا تھا۔

"ہم اس غلام کے ہاتھوں نہیں ہار سکتے! علیان اور اس کے ساتھیوں کو جتنا جلدی ہو سکے ختم کرنا ہوگا۔ ہم واپس آئیں گے، زیادہ طاقت کے ساتھ!"

اس نے قسم کھائی:
"اگر میں نے القمونیہ دوبارہ نہ جیتا تو میں اپنا نام مٹا دوں گا!"

علیان نے شہر کے بیچ میں عوامی دربار قائم کیا، جہاں ہر شہری کو اپنی بات کہنے کا حق دیا گیا۔ دارا، زہرہ، صفیہ، اور دیگر رہنما علیان کے ساتھ تھے۔

علیان نے بلند آواز میں اعلان کیا:
"آج سے القمونیہ کسی بادشاہ، کسی مولوی، اور کسی فوج کے تابع نہیں ہوگی۔ ہم سب برابر ہیں! ہم سب ایک ہیں!"

عوام نے خوشی سے تالیاں بجائیں، مگر کچھ لوگ چپ کھڑے تھے — وہ اب بھی پرانے نظام کے خواب دیکھ رہے تھے۔

رات کے اندھیرے میں ایک سائے نے علیان کے خیمے کے قریب آ کر سرگوشی کی:
"ہمیں ختم کرنے والے ابھی زندہ ہیں... اور وہ جلد لوٹیں گے۔"

 

 

باب ہفتم: تخت لرزنے لگا

 

باب ہفتم: تخت لرزنے لگا

القمونیہ میں اندھیری رات کے باوجود شہر جاگ رہا تھا۔ گلیاں جلتے ہوئے مشعلوں سے روشن تھیں، اور عوام کے دلوں میں پہلی بار غلامی کے خلاف آگ بھڑک رہی تھی۔ علیان، دارا، بی بی زہرہ، بی بی سلیمہ، اور صفیہ کی قیادت میں یہ بغاوت اب بغاوت نہ رہی — یہ ایک تحریک بن چکی تھی۔

محل میں مولوی اعظم اور جنرل عتیق سخت پریشان تھے۔ محل کے بڑے ہال میں دونوں کے بیچ تند و تیز بحث جاری تھی:

"یہ بغاوت کیسے پھیل گئی؟" مولوی اعظم نے غصے سے کہا، "ہم نے تو مذہب کو ڈھال بنایا تھا، عوام کیسے ہمارے خلاف ہو گئی؟"

جنرل عتیق نے تلوار میز پر پٹخی:
"جب عورتیں سڑکوں پر آ جائیں، تو سلطنتیں گر جاتی ہیں۔ ہمیں انہیں کچلنا  ہوگا، ورنہ یہ بغاوت پورے ملک میں پھیل جائے گی!"

"علیان کو زندہ رہنے کا کوئی حق نہیں!" مولوی اعظم نے چیخ کر کہا۔ "کل صبح اسے چوک میں لٹکا دو، تاکہ لوگوں کو عبرت ہو!"

دوسری طرف  دارا، اور بی بی زہرہ ایک خفیہ جگہ پر عوامی رہنماؤں کے ساتھ بیٹھے تھے۔ زہرہ نے کہا:
"ہمیں صرف علیان کو بچانے کا نہیں، پورے نظام کو گرانے کا عزم کرنا  ہوگا۔ اگر ہم نے آج قدم پیچھے ہٹایا  تو یہ ظالم  دوبارہ قابض ہو جائیں گے!"

دارا نے اثبات میں سر ہلایا:
"کل کا  دن فیصلہ کن ہوگا۔ ہم علیان کو چوک تک پہنچنے نہیں دیں گے۔"

صفیہ آگے بڑھی اور بولی:
"میں عورتوں کو منظم کر چکی ہوں۔ کل کے دن ہم بازاروں میں نکلیں گے — اگر ہمارے بھائی لڑ سکتے ہیں، تو ہم بیٹیاں بھی پیچھے نہیں رہیں گی!"

اگلی صبح چوک کھچا کھچ بھرا ہوا تھا۔ علیان کو زنجیروں میں جکڑ کر لایا گیا۔ اس کا جسم زخموں سے چور تھا مگر چہرے پر سکون تھا۔

مولوی اعظم منبر پر کھڑا چیخ رہا تھا:
"یہ شخص دین کا دشمن ہے، یہ ریاست کا غدار ہے! جو بھی اس کا ساتھ دے گا، وہ دوزخی ہے!"

لیکن علیان نے اپنی کمزور آواز میں کہا:
"میں غدار نہیں ہوں، میں آزاد ہوں۔ غدار وہ ہیں جو خدا کے نام پر انسانوں کو غلام بناتے ہیں، جو مذہب کو اپنی طاقت کا ہتھیار بناتے ہیں۔ میں نے سچ کے سوا کچھ نہیں کہا!"

جیسے ہی جلاد نے تلوار اٹھائی، بی بی زہرہ اور صفیہ نے عورتوں کے ہجوم کے ساتھ نعرہ بلند کیا:
"ظلم کے خلاف بغاوت حرام نہیں — فرض ہے!"

عورتیں سفید چادریں لہراتی ہوئی آگے بڑھیں، اور مردوں نے بھی ان کا ساتھ دیا۔ دارا نے فوج کے کچھ باغی سپاہیوں کے ساتھ حملہ کر دیا۔

جلاد کا ہاتھ کانپ گیا، اور علیان کی زنجیریں ٹوٹ گئیں۔ وہ چوک کے بیچ کھڑا ہو گیا اور پوری قوت سے چیخا:
"آج کے بعد القمونیہ آزاد ہو گی! ہم غلامی کے طوق اتار پھینکیں گے!"

مولوی اعظم گھبرا کر منبر سے نیچے اترنے لگا، مگر صفیہ آگے بڑھی اور اس کا راستہ روک لیا:
"تم نے میرے والد کو شہید کیا، میری ماں کو قید کیا — آج میں انصاف لینے آئی ہوں!"

مولوی نے خوفزدہ ہو کر پیچھے ہٹنے کی کوشش کی، مگر عوام کا ہجوم آگے بڑھ چکا تھا۔ وہ اسے دھکیلتے ہوئے چوک کے بیچ میں لے آئے۔

کسی نے نعرہ لگایا:
"ظلم کے سردار کو آج  انصاف کے کٹہرے میں کھڑا کرو!"

علیان نے آسمان کی طرف دیکھا، جہاں سورج اپنی پوری آب و تاب کے ساتھ نکل رہا تھا۔ اس نے دارا، زہرہ، صفیہ، اور باقی عوام کو دیکھا، جن کی آنکھوں میں اب خوف نہیں تھا — امید تھی۔

"آج القمونیہ نے آزادی کا پہلا قدم اٹھایا ہے... مگر جنگ ابھی ختم نہیں ہوئی۔" علیان نے آہستہ سے کہا۔

 

 

باب ششم: زنجیروں کے سائے میں چراغ

 

باب ششم: زنجیروں کے سائے میں چراغ

القمونیہ کے بازاروں میں اب سناٹا تھا، مگر اس سناٹے میں ایک خوفناک خاموشی چھپی ہوئی تھی۔ ہر گلی میں فوجی پہرہ  دے رہے تھے، مسجدوں کے منبر سے بددعائیں سنائی  دے رہی تھیں، اور ہر دیوار پر علیان اور اس کے ساتھیوں کی تصویریں لگا دی گئی تھیں — نیچے بڑا سا لکھا تھا:

"غدار ِ دین اور غدارِ وطن!"

علیان اور اس کے قریبی ساتھی اب چھپتے پھر رہے تھے۔ بی بی زہرہ اور بی بی سلیمہ بھی غائب تھیں، کسی کو ان کا سراغ نہ مل سکا۔ مگر قید و بند کے باوجود یہ تحریک ختم نہ ہوئی۔

اسی دوران، ایک نیا کردار سامنے آیا — دارا۔
دارا  ایک سابق سپاہی تھا، جس نے فوج میں رہتے ہوئے ظلم اپنی آنکھوں سے دیکھا تھا۔ وہ ان معصوم کسانوں کی چیخیں نہیں بھول پایا جن کے گھروں کو فوج نے "بغاوت کے شبہ" میں جلا دیا تھا۔ اس نے فیصلہ کر لیا تھا کہ وہ مزید اس ظالم مشینری کا حصہ نہیں بنے گا۔

دارا نے علیان کو خفیہ ٹھکانے پر ڈھونڈ نکالا اور کہا:
"میں فوج کو چھوڑ کر آیا ہوں۔ میں نے حلف ملک کی حفاظت کا اٹھایا تھا، مگر مجھے حکم ظلم کا ملا۔ میں تمہارے ساتھ ہوں!"

علیان نے اسے دیکھا، اور پہلی بار مسکرایا:
"ہم سب اپنے ضمیر کے قیدی ہیں، دارا۔ تم نے آزادی کا راستہ چن لیا ہے — اب پیچھے مڑنے کا کوئی راستہ نہیں۔"

علیان پر قید و بند کی آزمائش

کچھ دن بعد، فوج نے چھاپہ مار کر علیان کو پکڑ لیا۔ اسے شہر کے مرکزی چوک میں زنجیروں میں باندھ کر پیش کیا گیا۔ لوگوں کو زبردستی اکٹھا کیا گیا تاکہ وہ دیکھیں کہ "باغیوں کا انجام کیا ہوتا ہے"۔

مولوی اعظم نے منبر پر کھڑے ہو کر اعلان کیا:
"یہ شخص دین کا  دشمن ہے، ریاست کا  دشمن ہے! اس نے عورتوں کو بغاوت پر اکسانے کی کوشش کی، اور یہ فساد پھیلانے کا مجرم ہے۔ اس کے لیے موت سے کم کوئی سزا نہیں!"

علیان کی آنکھوں میں اب بھی خوف کا نام و نشان نہ تھا۔ اس نے بلند آواز میں کہا:
"تم ہمیں کافر کہہ سکتے ہو، غدار کہہ سکتے ہو، مگر سچ کو جھوٹ نہیں کہہ سکتے! تم نے خدا کے نام پر اپنی سلطنت کھڑی کی ہے، مگر خدا نے تمہیں اختیار نہیں دیا کہ اس کے بندوں کو غلام بنا  دو۔"

لوگوں میں ہلچل مچ گئی۔ کئی لوگ آنسو بہا رہے تھے، کچھ خاموش تھے، اور کچھ کے دل میں علیان کی باتیں آگ کی طرح جل رہی تھیں۔

اچانک بھیڑ میں سے ایک آواز ابھری:

"ہمیں علیان کے ساتھ مرنا  منظور ہے، غلامی منظور نہیں!"

یہ بی بی زہرہ تھیں، جو برقعے میں چھپ کر واپس آئی تھیں۔ ان کے ساتھ بی بی سلیمہ بھی تھیں، اور ان کے پیچھے سینکڑوں عورتیں کھڑی تھیں، جنہوں نے سفید چادریں سر پر لی ہوئی تھیں — آزادی اور حق کا نشان!

بی بی زہرہ نے بلند آواز میں کہا:
"ہماری بیٹیاں قید میں ہیں، ہمارے بیٹے زنجیروں میں ہیں، مگر ہمارے حوصلے آزاد ہیں! آج ہم فیصلہ کریں گے کہ القمونیہ کا مقدر کیا ہو گا — غلامی یا آزادی!"

صفیہ، ایک نوجوان لڑکی، جس کے والد کو فوج نے قتل کر دیا تھا اور ماں کو "باغی کا گھرانہ" کہہ کر قید کر لیا گیا تھا، بھی آگے بڑھی۔ اس نے لرزتی ہوئی آواز میں کہا:

"میں نے اپنے باپ کا  خون  دیکھا ہے، میں نے اپنی  ماں کو قید میں تڑپتے دیکھا ہے — اب میں مزید نہیں دیکھوں گی! آج میں لڑوں گی!"

اس کی آنکھوں میں خوف نہیں، صرف انتقام تھا۔

اس دن القمونیہ کی گلیوں میں تاریخ نے کروٹ لی۔ عورتیں، مرد، بچے — سب کھڑے ہو گئے۔ دارا نے فوجی لباس اتار کر عوام کو قیادت دی، علیان کو جیل سے چھڑایا، اور شہر میں جنگ چھڑ گئی۔

محلات لرزنے لگے، مساجد کے منبر پر پہلی بار "ظلم کے خلاف" آواز گونجنے لگی۔

رات کے اندھیرے میں علیان نے قلعے کی جیل سے باہر آکر آسمان کو دیکھا۔ روشنی کے سائے ٹمٹما رہے تھے، اور دور سے بی بی زہرہ کی آواز آ رہی تھی:

"جب عورتیں بیدار ہو جائیں، توظلم کے تخت گر جایا کرتے ہیں!"